თუ თქვენ უკვე გაქვთ შევსებული აპლიკაცია საცხოვრებლით უზრუნველყოფის რომელიმე პროგრამის ფარგლებში, მაშინ თქვენთვის მონიჭებული ქულების შესახებ ინფორმაცია შეგიძლიათ იხილოთ ამ ვებ გვერდზე :
https://idpscoring.moh.gov.ge/

დევნილს აპლიკაციის შვსება შეუძლია, როგორც დევნილთა, ეკომიგრანტთა და საარსებო წყაროებით უზრუნველყოფის სააგენტოს ოფისებში, ასევე ნებისმიერ იუსტიციის სახლში.

განცხადებასთან ერთად დევნილთა , ეკომიგრანტთა და საასრებო წყაროებით უზრუნველყოფის სააგენტოში წარდგენილი უნდა იქნეს:
· არასრულწლოვანი პირის დაბადების მოწმობა,
· მშობლის (მშობლების) დევნილის მოწმობა
· მშობლის (მშობლების) ან მისი სხვა კანონიერი წარმომადგენლის თანხმობა არასრულწლოვანი პირისათვის დევნილის სტატუსის მინიჭებაზე.
არასრულწლოვანი პირისათვის დევნილის სტატუსის მინიჭების შესახებ განცხადებით სააგენტოს ან მის ტერიტორიულ ორგანოს მიმართავს არასრულწლოვანი პირის მშობელი (მშობლები) ან მისი სხვა კანონიერი წარმომადგენელი.

დევნილად ითვლება საქართველოს მოქალაქე ან საქართველოში სტატუსის მქონე მოქალაქეობის არმქონე პირი, რომელიც იძულებული გახდა დაეტოვებინა მუდმივი საცხოვრებელი ადგილი იმ მიზეზით, რომ უცხო ქვეყნის ოკუპაციის, აგრესიის, შეიარაღებული კონფლიქტის, საყოველთაო ძალადობის ან/და ადამიანის უფლებების მასობრივი დარღვევის გამო საფრთხე შეექმნა მის ან მისი ოჯახის წევრის სიცოცხლეს, ჯანმრთელობას ან თავისუფლებას ან/და ზემოაღნიშნული მიზეზის გათვალისწინებით შეუძლებელია მისი მუდმივ საცხოვრებელ ადგილზე დაბრუნება.

დევნილად ცნობისა და დევნილის სტატუსის მინიჭების შესახებ განცხადებით უნდა მომართოთ სააგენტოს ან მის ტერიტორიულ სამმართველოებს. განაცხადს უნდა ერთვოდეს შემდეგი დოკუმენტაცია:

• პირადობის დამადასტურებელი დოკუმენტის ქსეროასლი;
• აფხაზეთის ავტონომიური რესპუბლიკის მთავრობისა და ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციის შესაბამისი სტრუქტურის ან ადგილობრივი თვითმმართველობის წარმომადგენლობითი ორგანოს და მათი შესაბამისი კომისიების მიერ გაცემული ცნობა/დასკვნა, რომელიც ადასტურებს განმცხადებლის და მისი ოჯახის წევრების იძულებით გადაადგილებამდე მუდმივ საცხოვრებელ ადგილზე ცხოვრების ფაქტს და ოჯახის შემადგენლობას (ამ უკანასკნელის შესაძლებლობის შემთხვევაში).
• დევნილის შეხედულებისამებრ ან/და სააგენტოს მოთხოვნის შესაბამისად საჭირო ის საბუთები და მტკიცებულებები, რომლებიც იწვევს საფუძვლიან ვარაუდს იმისა, რომ პირის მოთხოვნა დევნილის სტატუსის მინიჭების შესახებ შეესაბამება „საქართველოს ოკუპირებული ტერიტორიებიდან იძულებით გადაადგილებულ პირთა – დევნილთა შესახებ“ საქართველოს კანონის მე-6 მუხლით განსაზღვრულ გარემოებებს.

გადამისამართების შესახებ განცხადებით უნდა მომართოთ სააგენტოს ან მის ტერიტორიულ სამმართველოებს. განაცხადს უნდა ერთვოდეს შემდეგი დოკუმენტაცია:

• ნოტარიალურად დამოწმებული ბინის მესაკუთრის თანხმობა;
• ბინის მესაკუთრის პირადობის მოწმობა;
• საჯარო რეესტრის ამონაწერი;
• დევნილი ოჯახის წევრების პირადობისა და დევნილის მოწმობები.
• კომპაქტურად დარეგისტრირების შემთხვევაში საჭიროა ობიექტის მესაკუთრის თანხმობა.

თუ დევნილის დასაბეგრი შემოსავალი თვეში შეადგენს 1250 ლარს ან მეტს, დევნილს მომდევნო თვეში შემწეობა შეუჩერდება. თუ შემდგომ თვეში დევნილის დასაბეგრი შემოსავალი არ აღემატება 1250 ლარს შემწეობა ავტომატურად აღდგება.

საცხოვრებელი ფართების განაწილება კრიტერიუმების გათვალისწინებით მიმდინარეობს. თითოეული დევნილი ოჯახის მიერ შევსებულ აპლიკაციას ენიჭება შესაბამისი ქულა, რაც ბინის მიღების რიგითობას განსაზღვრავს.
სააგენტოს მონიტორინგის სამსახური დევნილი ოჯახებისთვის მინიჭებულ ქულებს ადგილზე ამოწმებს. გადამოწმებული განაცხადები, გადაწყვეტილების მისაღებად, დევნილთა საკითხების შემსწავლელ კომისიას წარედგინება.

იძულებით გადაადგილებული ოჯახების განსახლების მიზნით, თბილისსა და რეგიონებში მასშტაბური სამშენებლო სამუშაოები მიმდინარეობს.
თანამედროვე სტანდარტების შესაბამისი კორპუსები 5 ქალაქში: თბილისში, ზუგდიდში, ქუთაისში, რუსთავსა და ბორჯომში აშენდება.
მომდევნო 3 წლის განმავლობაში, სრულად გარემონტებული ბინა 7000 დევნილ ოჯახს გადაეცემა. განსახლების პროექტების ფარგლებში განაცხადის შევსება იძულებით გადაადგილებულ ოჯახებს სააგენტოსა და მის ტერიტორიულ სამმართველოებში და ქვეყნის მასშტაბით არსებულ ნებისმიერ იუსტიციის სახლში შეუძლიათ. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.

სააგენტო დევნილი ოჯახების განსახლების მიზნით სოფლად სახლებსაც შეისყიდის. „სოფლად სახლის“ პროექტის ფარგლებში, დევნილი ოჯახი თავად არჩევს კერძო სახლს მიწის ნაკვეთით, საქართველოს ნებისმიერ რეგიონში. კრიტერიუმების დაკმაყოფილების შემთხვევაში კი, სააგენტო დევნილი ოჯახისთვის აღნიშნულ სახლს შეისყიდის.
პროექტის ფარგლებში, კომისია განიხილავს იმ დევნილი ოჯახების განსახლების საკითხს, რომლებსაც მინიჭებული აქვთ 1 ან მეტი ქულა.
მნიშვნელოვანია, რომ სახლების უმეტესობას თან ახლავს მიწის ნაკვეთები, რაც დევნილებისთვის შემოსავლის დამატებით წყაროს წარმოადგენს.
„სოფლად სახლის“ პროექტის ფარგლებში თანხის რაოდენობა ოჯახის სულადობიდან გამომდინარე განისაზღვრება:

• ოჯახი, რომელიც შედგება 1 წევრისგან – 22 000 ლარი;
• ოჯახი, რომელიც შედგება 2 წევრისგან – 25 000 ლარი;
• ოჯახი, რომელიც შედგება 3 წევრისგან – 28 000 ლარი;
• ოჯახი, რომელიც შედგება 4 წევრისგან – 31 000 ლარი;
• ოჯახი, რომელიც შედგება 5 წევრისგან – 34 000 ლარი;
• ოჯახი რომელიც შედგება 6 წევრისგან – 37 000 ლარი;
• ოჯახი რომელიც შედგება 7 წევრისგან – 40 000 ლარი;
• ოჯახი რომელიც შედგება 8 წევრისგან – 43 000 ლარი, ხოლო ყოველ შემდეგ წევრზე დამატებით 3000 ლარი.

საცხოვრებელი ფართის შესყიდვა შესაძლებელია დევნილი ოჯახის თანადაფინანსებითაც განხორციელდეს.
საცხოვრებელი ფართის შესყიდვის თაობაზე განაცხადის დაკმაყოფილების შემთხვევაში, დევნილ ოჯახებს სახლის შერჩევისთვის 6-თვიანი ვადა ეძლევათ.
„სოფლად სახლის“ პროექტის ფარგლებში, განაცხადების მიღება მუდმივ რეჟიმში მიმდინარეობს.

გადაუდებელი ან განსაკუთრებული საჭიროების შემთხვევაში, სააგენტო დევნილებს ერთჯერადი ფულადი დახმარებით უზრუნველყოფს. ერთჯერადი დახმარების გაცემის შესახებ გადაწყვეტილებას კომისია, კრიტერიუმების შესაბამისად, იღებს. ფულადი დახმარების გაცემა 6 თვეში ერთხელ არის შესაძლებელი.
პროექტით სარგებლობა შეუძლია დევნილს, რომელიც აკმაყოფილებს ჩამოთვლილ ერთ ან რამდენიმე კრიტერიუმს:
● ოჯახის წევრის გარდაცვალება – თუ გარდაცვლილის ოჯახი რეგისტრირებულია სოციალურად დაუცველი ოჯახების მონაცემთა ერთიან ბაზაში და მისი სარეიტინგო ქულა შეადგენს 100 001-ზე ნაკლებს;
● სოციალურად დაუცველი ოჯახების მონაცემთა ერთიან ბაზაში რეგისტრაცია – თუ დევნილი ოჯახი რეგისტრირებულია სოციალურად დაუცველი ოჯახების მონაცემთა ერთიან ბაზაში და მისი სარეიტინგო ქულა შეადგენს 30 001-ზე ნაკლებს;
● ონკოლოგიური დაავადება;
● მკვეთრად გამოხატული შეზღუდული შესაძლებლობების მქონე პირის სტატუსი;
● მრავალშვილიანობა – თუ ოჯახის შემადგენლობაში არის 3 და მეტი 18 წელზე ნაკლები ასაკის ოჯახის წევრი;
● ქირურგიული ოპერაციის საჭიროება – თუ დევნილი ოჯახი რეგისტრირებულია სოციალურად დაუცველი ოჯახების მონაცემთა ერთიან ბაზაში და მისი სარეიტინგო ქულა შეადგენს 100 001-ზე ნაკლებს;
● ომის ვეტერანის/ომში დაღუპულის ან მარჩენალდაკარგულის სტატუსი – თუ ოჯახში არის საქართველოს ტერიტორიული მთლიანობისათვის, თავისუფლებისა და დამოუკიდებლობისთვის საბრძოლო მოქმედებების ვეტერანი ან ოჯახის წევრს მინიჭებული აქვს ომში დაღუპულის/მარჩენალდაკარგულის სტატუსი;
● მარტოხელა მშობლის/ქვრივის სტატუსი;
● მსხვერპლის სტატუსი - თუ დევნილს „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ საქართველოს კანონის შესაბამისად მინიჭებული აქვს მსხვერპლის სტატუსი და იმყოფება თავშესაფარში ან კრიზისულ ცენტრში;
● დევნილი ოჯახის საცხოვრებელის დაზიანება/განადგურება – თუ დევნილ ოჯახს დაუზიანდა/გაუნადგურდა საცხოვრებელი იმგვარად, რომ მასში ცხოვრება ნაწილობრივ ან სრულად შეუძლებელია.

გადაუდებელი საჭიროების შემთხვევაში, სააგენტო დევნილ ოჯახებს ქირის თანხით უზრუნველყოფს. ქირის გაცემის შესახებ გადაწყვეტილებას კომისია, კრიტერიუმების შესაბამისად, იღებს.
პროექტით სარგებლობა შეუძლია დევნილს:

• რომელსაც სახელმწიფოსგან არ მიუღია საცხოვრებელი ფართი (მათ შორის, არც ფულადი კომპენსაცია) და საკუთრებაში არ აქვს ალტერნატიული საცხოვრებელი ფართი;
• რომელიც ცხოვრობს ნგრევად ობიექტში, რაც დასტურდება შესაბამისი საექსპერტო დასკვნით;
• რომელიც ცხოვრობს განსაკუთრებით მძიმე პირობებში, რომელიც არ შეესაბამება მინიმალურ საცხოვრებელ სტანდარტებს;
• რომელიც დარეგისტრირებულია სიღარიბის ზღვარს ქვემოთ მყოფი ოჯახების მონაცემთა ერთიან ბაზაში და მისი სარეიტინგო ქულა შეადგენს 30001-ზე ნაკლებს;
• რომელსაც „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ საქართველოს კანონის შესაბამისად მინიჭებული აქვს მსხვერპლის სტატუსი, ამავე კანონის შესაბამისად იმყოფება თავშესაფარში ან კრიზისულ ცენტრში და ეწურება იქ ყოფნის პერიოდი.

სააგენტო, შესაბამის უწყებებთან თანამშრომლობის შედეგად, სახელმწიფო საკუთრებაში მცხოვრებ დევნილ ოჯახებს მართლზომიერ მფლობელობაში არსებული საცხოვრებელი ფართებს საკუთრებაში გადასცემს.
დაკანონების პროცესი, იძულებით გადაადგილებულ პირებს საკუთარი ქონების განკარგვის შესაძლებლობას აძლევს.
დევნილი ოჯახების ინტერესების გათვალისწინებით, მათი უშუალო მოთხოვნიდან გამომდინარე, სააგენტო კომპაქტური განსახლების ობიექტებში არსებული საერთო სარგებლობის ფართების ბინათმესაკუთრეთა ამხანაგობებისთვის საკუთრებაში გადაცემის პროცედურებაც ახორციელებს.
დაკანონების პროცესთან დაკავშირებულ ყველა ღონისძიებას, მათ შორის, კომპაქტური განსახლების ობიექტებში აზომვითი სამუშაოების ჩატარებას სააგენტო საკუთარი რესურსებით უზრუნველყოფს.
აღნიშნული პროცედურების გასატარებლად, საჭიროა, ამხანაგობის თავმჯდომარემ სააგენტოს საერთო სარგებლობის ფართების ამხანაგობისთვის გადაცემის თაობაზე განცხადებით მომართოს.

„სასათბურე მეურნეობის მხარდაჭერის საგრანტო პროგრამის“ მიზანს დევნილებისა და განსახლებული ეკომიგრანტების სასოფლო-სამეურნეო ინიციატივების მხარდაჭერა და მათი შემოსავლის ზრდა წარმოადგენს. საგრანტო პროგრამა სამიზნე რეგიონებში მცხოვრები დევნილებისა და ეკომიგრანტების საკუთრებაში არსებულ მიწის ნაკვეთებზე სათბურის მოწყობას ითვალისწინებს. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.

„ეკონომიკური აგენტის მხარდაჭერის“ პროგრამის მიზანს დევნილთა და ეკომიგრანტთა სამეწარმეო საქმიანობის ხელშეწყობა და ახალი სამუშაო ადგილების შექმნა წარმოადგენს. დევნილები და ეკომიგრანტები, რომლებიც მეწარმეობით არიან დაკავებული, საქმიანობის გაფართოებისთვის საჭირო ძირითადი საშუალებების შესაძენად, 7500 ლარის ფარგლებში დაფინანსდებიან. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.

დევნილთა, ეკომიგრანტთა და საარსებო წყაროებით უზრუნველყოფის სააგენტო განსახლებულ დევნილებსა და ეკომიგრანტებს სასოფლო-სამეურნეო საქმიანობის, სურსათის წარმოებისა და გადამუშავების ხელშეწყობის მიზნით გრანტებს გადასცემს. პროგრამის ფარგლებში, სააგენტო იძულებით გადაადგილებულ პირებს ხელის ტრაქტორებს, სხვადასხვა სახეობის მრავალწლიან კულტურებს, სასოფლო-სამეურნეო, სურსათის წარმოებისა და გადამუშავებისთვის საჭირო ინვენტარს შეუძენს. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.

დევნილთა, ეკომიგრანტთა და საარსებო წყაროებით უზრუნველყოფის სააგენტო იძულებით გადაადგილებულ პირებს თვითდასაქმების ხელშეწყობის მიზნით ხელსაწყოებსა და ტექნიკას გადასცემს. პროგრამაში ჩართვა პროფესიული სასწავლებლების კურსდამთავრებულ იძულებით გადაადგილებულ პირებს და იმ დევნილებსა და ეკომიგრანტებს შეუძლიათ, რომელთა პროფესიული საქმიანობა რაიმე სახის დოკუმენტით დასტურდება. დევნილები და ეკომიგრანტები, 2000 ლარის ღირებულების სახელობო იარაღებს, რაც მათ საქმიანობის წამოწყებასა თუ გაფართოებაში დაეხმარებათ თავადვე არჩევენ. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.

დევნილთა, ეკომიგრანტთა და საარსებო წყაროებით უზრუნველყოფის სააგენტო სახელმწიფო პროფესიულ საგანმანათლებლო დაწესებულებებში ჩარიცხულ დევნილებსა და ეკომიგრანტებს, სწავლის პერიოდში, ტრანსპორტირების ხარჯებს უფინანსებს. განაცხადების მიღების შესახებ დეტალური ინფორმაცია, მათ შორის ვადები წინასწარ ქვეყნდება.